القديمة .. نازل !!!

من ارشيف السيناريوهات .. هذا الموضوع كتب بتاريخ 19/11/2008م
تنــويه :
اي تشابه بين الشخصيات الواردة في هذا المقال والحقيقة هو من محض المصادفة الفنية .. ليس إلا ..


وقف (شلاقة) طالب الفرقة (الأولى) بكليتنا (العامــرة) صباح ذلك اليوم في موقف ميدان (جاكسون) في انتظار احدى (الهايســات) لتقلــّه الى الجامعة والتي تتوافد على الموقف مثل (نـُقــَّاط الدِرب) وبعد طول انتظار قرَّر أن (يكبــِّرها) ويركب حافلة . .
جلس (شلاقة) في المقعد قبل الأخير مجاوراً للنافـذة وجـاءت وجلست بالقرب منه فتــاة (متوسطة) الجمــال . . و . .
ــ هيييي . . (الشـيت) ده وقع منـِّك !!
نظرت اليه الفتـاة وأومأت برأسها دلالـة على (الشكــر)
ــ ده شيت (بوتنـي) ! انتي بتقري صيدلة ؟!
نظرت اليه الفتاة (مـرَّة أخرى) وأومأت برأسها دلالـة على (الإيجـاب)
ــ لكن ما حصل (شـُفتِك) . . انتي ما جيتي (الإستقبـال) ؟!
(عادت) ونظرت اليه وأومأت برأسها دلالـة على (النـفي)
ــ لــــــيه ؟!!!
(بـرقته) الفتـاة بنظرة لاحظها جميع من تابع الحوار من كنبة (شكـراً) دلــَّت على (انزعاجهـا) من كثرة الأسئلة
ــ أنــا آسف . . بس أنا زول بقولو عنِّي (حبــُّوب) و(بخش) في الناس (سريع) ! بالمناسبة نحنا لسة ما اتعرفنا علي بعض !!
وفي ذات اللحظة (طقطق) الكمساري مطالباً بالأجرة :
ــ هـــا . . أرح (آآآآآلورا)
ــ دايـرة تعملي شنـو ؟! والله ما بتدفعي . . (هــاك) . . اتنين (آآآه) !!
ثم عاد وخاطبها وهو يدخل (الباقي) في جيبه :
ــ طبعا ً أنا (شليق إبراهيم حنكو) وبيلقبوني (شلاقة) . . طالب قبلوني السنة دي هنا . . ودي اصلا ً (رغبتي) من زمان لأنو من ما (ولدوني) بموت في ريحة (الـدوا)!! . . وانا اصلا ً كان عندي (خالي) أخو (امي) من (ابوهـا) صيدلي واتوفــّى في حادث حـركة قبل سنتين اصلو كان سايق عربيتو (الكلــيك) في التــقاطع بتاع الـــ . . .
ــ نـــــــازل يا . . (قرصة) يا (معلــِّم) . . هنا يا (أصلـــي)
قالـها أحد الركاب وقد (هــَم َّ) بالنزول مقابل كلية (البيــان) . . وصــاحبنا ..!!
ــ ياخي نـاس (الكلية) دي مرتاحين كيف ! . . انتي عارفة ديل غير (قــِطيع) النجيلة دي ما عندهم . . اصلو عندنا (ود) جيرانا كان بقرا فيها وحسي خلاهــا سافر (الهند) . . والله كان قاعد يضرب لي طوااالي (هسي) ليهو شـهرين ما ضرب !!!
ــ يا (سلااااام) . . (النيل) ده (منظرو) مع الصباح مبالغة . . انتي عارفة انا (يومي) لو ما (شمِّيت) (الهوا) بتاع (الكبري) ده ما بفهم (المحاضرات) !!
( ويقوم بفتح (الشباك) ويطير شيـت الـ(بوتني) مرة أخرى . . وصــاحبنا ..!!
ــ عليك الله الـ(شيت) الواقع تحتك ده (جيـبو) !
ــ نفسي أعرف (التــراب) الكتير (الرادمنـو) ده (دايـرين) يعملو بيهـو شنو . . ياخي ده (هسي) كان عمل ليهو (حـِلـــَّة) كاملة . . تفتكـري يكونوا دايرين يعملو (تــرس) عشان (الفيضان) ؟!!!
( لم (تومئ) الفـتاة برأسها هذه المرّة لأنها اصلا ً لم تنظـر اليه و (طنشته) تماما ً :
ــ انا (بــرّاي) صح ! ... لكن يالله أهو الـ(واحد) يـكسِّر (تلج) اقصد (وكِت) ... انا كنت (بقول) في شنو ؟
ــ آآآه .. اتذكرت .. خالي الله (يرحمو)! .. عارفـة الذكرني بيهو شنو ؟ .. الــ(ستوب) ده .. لكن تصدقـي قالو الــ(ستوب) ده ذاتو (معمول) غلط .. المفروض يكونو (اربعة) اشارات .. قامو ناس (المرور) عملو (تلاتة) و (شالـو) الرابع عملوهو في التقاطع اللي (مـات) فيهو (خـالي) ..و.. نسيت (تاني) أسألك انتي اسمك (منو) ؟!!!
( صـاح (الكمساري) مخاطبا ً الركاب والحافلة تعبر مقابل (كوافير نجــاة) :
ــ هــا .. قديمــة نازل .. القديمــــة ناااااااازيييييييل

كـــــــــــــــسرة :
إندهش (سوّاق) الحافلة عند وصوله لبوابة الجامعة حينمـا نظر في (المراية) ولم يجد سوى (زول الشـباك) نازل وهــو (يحمل) شـيت الــ(بوتني) !!!!!!!

أقول ليك حاجة ولا بتزعل ؟
خليها بتزعل مني ساي يا خبرة

والله العظيم انت مبدع عدييييييييييييييييييييييييييييل بس عيبك انك هلالابي (مع العلم انو انا زااااااااااااااتي هلالابي حتي النخاع) بس سامع الناس بيقولوا كدا.

انا ما فهمتة اي شى

والله ياعبدو لقيتك حقار (انت قاصد بيها منو؟)

يديك العااافية يا ضياء و(منور المنتدى) ، ويا خالدونا قاصد بيها منو دي خليها (بالنية) ، أما انتا ياحربي ففي مثل قدييييييييييم قدم (نضارتك) بيقول : الفهم أقسام
انتا قايل ده (.........) !!