سجم قرايتك يا جنا #

سجم قرايتك يا جنا



سجم قرايتك يا جنا

ورينى نان عارف شنو

يوماتى تمرق من فجر

كارب صليبك من أسط

والشنطة ذى ظابط المطار

الراس مكمكم بالنضم

واريتو كان نضم الكتب

........

حليل زمان ...زمن القراية بعزتة

زمن الشنيطة ضراع قماش

والشدة زى خاتم الدهب

والراس مردم بالعلم

استاذ مكمل بالادب

تفرحبو أمو الولدتو

ويتمنو كل الأمهات

ام المدرس ..اقعدى جاى

الجلسة عاد ما حقته

ويتضايرن كل البنات

واريتو لى

.......

اه من زمن ......عرد مشى

دى المدرسة ...الليلة ذى المدرسيب

ختولها راعى و حارسه

ودفسوها بى شيتا عجيب

لا راعو كم عمر البجيها يأانسة

بال لى مدرسة لا ختو

......

سجم قرايتك ياجنا

هو منو المؤدب شان قرأ
للمفتش عندنا كان

أصبح حرامى وضدنا

لا همو نحنا

ولا القبيل ختوه فى كبد السماء

....

دى قراية دى

كم مبنى وقعن فى السنة

الوطاه وكم طائرة حرقن فى

وكم كبري غرقن من مطر

دى الهندسة

.....

كم زول سقط فى مضممضة

وكم طن دواء..تلفان ومالى السوق ملى

دى الصيدلة

.......

كم زول نزف ...لمن كضم

بى غلطة من دكتور فلان

سيد الاسم

شارع الدكاترة

ويا فطة زى علم الوطن

فاتورتو بالشيت الفلانى

وناس صفوف..... تحجز حجز

دى الدكترة

......

كم حادثة حصلت فى البلد

والدنيا جاطت بالخبر

اعلام يناضم ليل نهار

واعلامنا ما هاميه شي

وحالف قسم

ما يقول بقم

الا المسلسل والمديح

مستسنيات

أهى دى الصحافة رسالته

......

كم زول سرق

خزنتنا فى عز النهار

والقاضى قال

غلط المحاسب والغفر

عدل شنو

القانون كده

وكم سؤال

تايهات سنين

دايرات اجابة وما لقن

وكم وكم

.....

سجم قرايتك يا جنا

وسجم الوظيفة الحارسة

مليون شهادة مزورة

شوف البطالة الفى الشوارع والبيوت

عشرين سنة الشول بناته يساككن

جاريات يطاردن فى الشغل

و بت هنادى

فريت سنة

بقت المديرة فى مدرسة

وتهانى بى خبرة جماله وضحكته

ختوها فى مكتب وزير الثعلبة

وولد خميس

اتيم ويكابس فى الكتب

أبوه مات فوق الحرب

مسكينة أمو

تجرى جاى ..وتجرى جاى

عشمانة باكر ينجده

عصرت قليبة وقرتو

لكن خسارة على التعب

جات الوساطة وهدته

مفروض يكون فى محل عمر

الكان قبيل طيش الفصل

حليل زمان ... زمن الشطارة بقدرته

........

هوى يا جنا

شوف ليك طريقة بلا الدروس

صنعة أبوك احسن درب

أقل حاجة ... رزق حلال

مولود ضراع ....ينتح نتح

يعرق جبين ..ينزف عرق

طق ... طق ..يتلاحقن ... وتسيل بحر

تمرق سموم وتنضفك

كان للهدوم ... فت لوح صابون بيغسلها

.....

انا بس بدورك

تبقى راجل وفيك ضمير

و الشايفه ده

المدرسة درب العوج

خليها تب

طال ما المدرس

جارى بى

درب الرواتب والقروش

شهرين تلاته وما تجى

وشن الرويتب ... فت سبوع

يبقالو ماضى وزكريات

ويوماتى أرجع ياولد

جيب القروش

طردوك شهور ... والعام قسم نص السنة

قرعوبة راسك .. فيه شنو

المسعول منو ...الحيكومة وين

سجم القراية الجابته

وحات أبوى ...أكان جيت انا

أبقى المديرة فى جامعة

مدير شنو

هو فاضى من مشى الوزارة

وكم سنة فى المنضمة

سجم قرايتك ياجنا

وسجم الوظيفة الحارسة

......

كفاك خلاص ... أقيف هنا

بنبر أبوك زى البنابر فى الفصل

وأفضل كمان

حليل زمان... كنب الخشب

زمن السنط غيب غيب

زمن القطر

طقت سفر ...حنتوب هناك حاضنة البحر

زمن الشهادة بعزتا

سجم قرايتك يا جنا

وسجم الوظيفة الحارسة

مبدع دوما في إختيار مواضيعك ..

رووووعة والله .. يديك العافيـــــــة

وكلام كله صحيح.
وكلها حكم