تبقى أكيد في . . . السودان !!!

proff_khibra 7/9/2009, 20:59

• لو بحثت عن خط (عبور مشاة) أو (أمامك مدرسة) أو(منحنى) فى كل (العاصمة) ولم تجده تبقى أكيد فى السودان

• لو إنت فى بلد فيهو سنه سابعة وسنة تامنه ابتدائى… تبقى أنت أكيد فى السودان

• لو طالعتك إعلانات شركات (مسئول) كبير وهو لا زال (فى الخدمة)… تبقى أنت أكيد فى السودان

• لو (لبد) ليك شرطى (مرور) فى نهاية شارع (إتجاه واحد) وخلاك لمن دخلت وجاك بى (دفتر إيصالاتو)… تبقى أنت أكيد فى السودان

• لو لقيت فى بلد ما فيهو (معينات البحث العلمى) وكل يوم الجامعات تناقش (خمسين) رسالة دكتوراة و(ميتين) رسالة (ماجستير) … تبقى أنت أكيد فى السودان

• لو إنت فى بلد وزارة الصحة فيهو قالت (الدواء) ده (فاسد) أحظروهو .. وبعد شويه قالت (ما فاسد) خلوهو .. وبعد شويتين (فاسد) أمنعوهو …. تبقى أنت أكيد فى السودان

• لو لقيت فى بلد (الصحف) بتتقفل بى (ماده) فى القانون (معموله) للمطاعم … تبقى أنت أكيد فى السودان

• لما تلاقى الترزى كاتب على باب المحل بتاعو آيه بتقول ( وفصلنا كل شئ تفصيلا) صدق الله العظيم … تبقى أنت أكيد فى السودان

• لما تتعمل عملة جديده وتكون قابلة (للتزوير) … تبقى أنت أكيد فى السودان

• لما تخلص تدخل (مكان) وتيجى تركب عربيتك تلاقى (المساحات) مرفوعه عشان تعرف على طول انو فى واحد مسحها ليك وح ياخد منك ألف جنيه

• لو (إتزنقت) وما لقيت (مراحيض عامة) … تبقى أنت أكيد فى السودان

• لو قرأت الصحف فى 1987 و فى 2016 عن (إنتهاء قطوعات) الكهرباء ولقيت نفس الكلام فى صيف 2030 … تبقى أنت أكيد فى السودان

• لو بحثت فى كل البلد عن مواطن عضو فى (الحزب الحاكم) وما لقيت… تبقى أنت أكيد فى السودان

• لو أهم (كبرى) فى عاصمة البلد صيانتو عاوزة ليها (سنتين) .. … تبقى أنت أكيد فى السودان

• لو لقيت إنو وزارة الداخلية عندها مؤسسات (تعليمية) ووزارة التعليم عندها مؤسسات (صحية) ووزارة الصحة عندها (شركات إنشائية)… تبقى أنت أكيد فى السودان

• لو لقيت طالب بيقرأ (طب) ونسبتو 59% …. تبقى أنت أكيد فى السودان

• لو عاوز تفتح (بلاغ) وقالو ليك أدفع (رسوم) …. تبقى أنت أكيد فى السودان

• لو إتقدمت لى وظيفة وعندك (امتياز) وقامو عينو زميلك العندو (مقبول) طبعا يبقى انت اكيد اكيد فى السودان

• لو وجدت عيادات (للدجل والشعوذة) فاتحة تستقبل (الزبائن) على عينك يا تاجر…. تبقى أنت أكيد فى السودان

• لو دخلت (الوزارة) وإنت مؤجر فى (زقلونا) وطلعت وعندك عمارتين فى (قاردن سيتى) …. تبقى أنت أكيد فى السودان

• لو إشتغلت فى الخدمة المدنية 30 سنه وأدوك معاش شهرى يساوى 6 كيلو لحمة …. تبقى أنت أكيد فى السودان

• لو توقفت (الحركة) إثناء ساعات (الذروة) وإكتشفت أن السبب (كشه) …. تبقى أنت أكيد فى السودان

• لو عدمت (التعريفة) وكمان دخلت فى (ديون) للإيفاء بنفقات (فراش) قريبك الذى توفى إلى رحمة الله …. تبقى أنت أكيد فى السودان

• لو وجدت أن (ترخيص عربتك) يساوى (ربع) قيمتها …. تبقى أنت أكيد فى السودان

• لو تقدم إبنك (المهندس) لشغل وظيفة وكان (الإنترفيو) عن (صلاة الجنازة) …. تبقى أنت أكيد فى السودان

• لو (فجأة) إكتشف (المسئولون) أن (الخريف) على الأبواب …. تبقى أنت أكيد فى السودان
• لو عندك (الكلية) اليمين متعطله وعاوزين يشيلوها ليك قامو (إستأصوا) الشمال السليمة لأنو (الدكتور) كان ماسك الأشعة (بالمقلوب) …. تبقى أنت أكيد فى السودان

• لو مكث (مرتبك) معك (تلاته ساعات وإطناشر دقيقه) هى الفترة من لحظة إستلامه من الصراف إلى حين عودتك للمنزل …. تبقى أنت أكيد فى السودان

• لو فاز فريقك الذى تشجعه على الفريق الخصم فى مباراة الذهاب 8/صفر وخسر فى مباراة الإياب 12/صفر…. تبقى أنت أكيد فى السودان

• لو وجدت أن رؤساء (الأحزاب) هم (رؤساء) مدى الحياة …. تبقى أنت أكيد فى السودان

• لو وجدت أن نسبة الفقر تزداد بإزدياد (معدل النمو) …. تبقى أنت أكيد فى السودان

كسرة :
لو قريت الحاجات الفوق دى كلها ولقيتها موجوده وما لقيت إنك فى (السودان) تبقى أكيد (غلطان) !!

منقــــــــوووووووووووووووووووووووووووووووووووووووووووووول

عزام 7/9/2009, 22:27

ولمن تكون ماشي وتلاقي في كل زقاق كليب ... تبقى اكيد في السودان
Laughing

nicel موضوع

**Orwa Abdelmonim** 7/9/2009, 23:13

تسلم .. لكن الموضوع دا زي التقول لاقاني في المنتدي ..

proff_khibra 7/9/2009, 23:27

طيب يا د. عروتك وين المشكلة ؟!!!
عععععععععععادي جدن
عشان تتاكد انك بالجد قاعد (معانا و كدة)

عدنان عبدالله 8/9/2009, 01:44

لو كنت ماشي في الطريق وفاجئة اتعترت و وقعت في حفرة لماسورة موية تبقى اكيد انت في السودان
تسلم يا راقي على الموضوع ><L

**ahmed amin** 8/9/2009, 04:21

لو فريق الكوه بتاع بلدك فاز في المباراه الافتتاحيه لبطوله سيكافا بعدد وافر من الاهداف وجا اتغلب من نفس الفريق في النهائي تبقي اكيد في سيكافا اقصد التكسي معليش قصدي السودان

لو عندكم فريق فيه ماسوره بي خمسه مليون دولار تبقي اكيد في المريخ lol!

مشكور

**bob** 8/9/2009, 05:07

ahmed amin كتب:لو فريق الكوره بتاع بلدك فاز في المباراه الافتتاحيه لبطوله سيكافا بعدد وافر من الاهداف وجا اتغلب من نفس الفريق في النهائي تبقي اكيد في سيكافا اقصد التكسي معليش قصدي السودان

لو عندكم فريق فيه ماسوره بي خمسه مليون دولار تبقي اكيد في المريخ

مشكور

ولو كل ما فتحت التلفزيون لقيت دعاية محل اثاث تبقى اكيد فاتح قناة السودان

نادر جسوووووووور 8/9/2009, 07:57

شنو السلبية بتاعتكم دي شباب لو داير تعيش سعيد و تحس بالامان تنوم مرتاح و تصحى مرتاح وتتطلع الشارع و تحس نفسك سيد مكان و لو دورتا العالم كلو ما حتلقى الاحساس الجميل ده احساس انك في السودان حاول غير للافضل بس ده ما يعمي عيونا من جمال دنيانا

**d.sombola** 8/9/2009, 20:07

Orwa Abdelmonim كتب:تسلم .. لكن الموضوع دا زي التقول لاقاني في المنتدي ..

Musab Alrekaby 8/9/2009, 23:49

وعندما تصبح السماء سقفاً لبيتك و الغيوم تأتي من قبلتك فانت اكيد تشاهد إعلان لشركة ( زين )
اقصد فانت اكيد في وسط سيل في السودان

مشكوور يا خبرة

mohanad 11/9/2009, 20:42

احيي النضال الكتابي من داخل المنتدي....ياجماعة خلو الزول يقول الفي نفسو....علي الطلاق البتقولو دا كلو حاصل.....لكن خلي نظرتك دايما ذي ماقالوا ناس عقد الجلاد :
كل وجعة تفرهد الاحساس جوايا

proff_khibra 14/9/2009, 20:31

والله يا نادر كلامك ده ذكرني بي المقطع بتاع خليفة خلف خلف الله خلف خلاف المحامي مع المحكمة لامن قال ليهم : من هم الأطفال ؟ انهم ابناؤنا فلذات أكبادنا التي تمشي على الأرض قام سرحان عبد البصير رد قال شنووووووووو؟!!!!
ــ هو البيه من الحزب الـــ (تييييييييييييت) و ده لو حضرت المسرحية في تلفزيون حكومي، اصلو عمّال (يؤول) عليّ (الطلاء) بالتلاتة !!!

هسي ده تشبيه ده !!!!

Mankaka 15/9/2009, 16:42

لو مشيت استاد ولقيت جمبو زريبة فحم....ده اكيد في السودان lol!

نادر جسوووووووور 17/9/2009, 03:25

عبدالرحمن انا ما فهمت حاجة من كلامك ده اصلا انت عارفني انا شاكى في انك من اصحاب المزاج العااااالي و تقريبا بديت اتأكد ولا رايكم شنو ياجماعة ؟ هاهاهاها

السيسي الحكيم 17/9/2009, 04:46

لما تمشي ف الشارع وتلقي الناس الطيبانه تبقي ف السودان
لما الناس توقفك في نص الظلط تقولك علي اليمين الا تجرح صيامك معانا تبقي ف السودان
ولما تبقي ف السودان تبقي اكيد.........في قلبي جوا

تبقى أكيد في . . . السودان !!!

تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!

رد: تبقى أكيد في . . . السودان !!!