عرسان . . تصديــــــر !!

proff_khibra 15/8/2009, 17:24

فجأتن) قامت قناة (الإخبارية) الفضائية بقطع برامجها ليظهر أحد المذيعين :

من الخرطوم العاصمة السودانية إليكم هذا الخبر العاجل ومراسلنا (الجوهر الفردى) :

(الكامير) فى لقطة (عامة) general فى خلفيتها عدد من المتظاهرين ذوى سحنات وأعمار وملابس مختلفة (ثم) تتجه الكاميرا نحو (المراسل) الذى يقف فى وسط التظاهرة ممسكاً بالمايكرفون :

سيداتى ساداتى فى تظاهرة غريبة من نوعها توجه أكثر من مليونى شاب إلى الساحة الخضراء بالخرطوم وهم يحملون اللافتات التى تطالب الدولة بتزويجهم أسوة بالفتيات واللواتى قامت الدولة مؤخراً بحل مشكلتهن وذلك عبر إتفاقية (تزاوج مشترك) قامت على إثرها بإستيراد أعداد هائلة من (العرسان الصينيين) ... سيداتى وسادتى الآن تتوقف التظاهرة حيث من المقرر أن يخاطبها أحد كبار المسئولين والذى سوف يتم تسليمه مذكرة قام بإعدادها هؤلاء المتظاهرون وإلى ذلك الحين دعونا نستطلع أراء بعض المشاركين فى هذه التظاهر :

- معاى منو ؟

- حسن عمرين

- يا حسن إنتو بتطالبو بشنو والغرض من التظاهرة دى شنو؟

- والله شوف أول حاجه الغرض من المظاهرة دى إنو نورى الحكومة إنو فى مشكلة حقيقية وإنو كمية الشباب الما لاقى طريقه يعرس ويفتح ليهو بيت بقت نسبة خيالية وبنطالب بإنو يشوفو لينا طريقه ذى ما شافو للبنات (عرسان إستيراد) !

- يا حسن إنتا عمرك كم ياخى إنتا زول كبير كده معقول تكون ما عرستا لى هسه؟

- أعرس متين يعنى ؟ الناس ديل لمن جو أنا عمرى كان 22 سنة !

يلتفت (المراسل إلى شخص آخر) :

- معانا منو ؟

- الحاج عبدالسلام الحاج

- لكن يا حاج إنت معقول لى هسه ما عرست وخشيت دنيا؟

- لا ... لا عرست لكن مرتى ماتت زمااان فى الوضوع !

- وعاوز تعرس تانى ؟

- ومالو الناس دى كووولها ما بتعرس (تانى) وكمان نسوانهم حيات !

- لا أنا بقصد ما تدى الأولاد الصغار ديل فرصة !

- أديهم فرصة أنا لاعب فى (خانتهم) أنا ما ذيى زيهم عاوز أعرس وأحفظ نفسى !

يلتفت (المراسل إلى شخص آخر) :

- معانا منو؟

- حسين باجاج؟

- يا حسين إنتا شغال شنو؟

- سواق ركشة

- سواق ركشة وما قادر تعرس !

- أعرس انا لكن وإلا يعرسو ناس المرور الكل يوم مقطعننا إيصالات بالشئ الفلانى !

- وطيب يا حسين إنتو هسه عاوزين شنو من مظاهرتكم دى ؟

- عاوزين الحكومة تشوف لينا طريقه نعرس بيها عشان الشيطان وكده !

- والشيطان دخلو شنو فى الحكاية دى؟

- كيييييف يا فرده ؟ نحنا بتركب معانا حاجات والله الزول لو ما بخاف الله وعاصم نفسو من الغلط كان المايقوما دى إتملت !

فجأة تنطلق ساونات من أماكن مجهولة (ربما عربات إعلام) صادحة بأغانى الحماسة من نوعية (النار ولعت) يدب الحماس فى المتظاهرين فى اللحظة التى يصعد فيها أحد المسئولين إلى منصة الخطابة :

- يا جماعة إنتو ما تفتكرو نحنا ناسينكم لكن نعمل شنو مع (الأمبريالية العالمية) و(التحالفات الصهيونية) الإستعملوا معانا كافة أنواع الحظر والحصار وحاولو يعرقلو علينا مسيرة التنمية والرخاء لكن على الرغم من ده كلو نحنا قلنا بس ننتهى من (قصة الكبارى) دى نقبل عليكم نشوف مشاكلكم شنو

- (أصوات) : تسقط تسقط الأمبريالية .. تسقط تسقط الأمبريالية ..

(أصوات) : تسقط تسقط الصهيونية .. تسقط تسقط الأمبريالية ..

- (المسئول مواصلاً) : هسه يا جماعة لو ما الحظر ده كنتو تكونو عرستو من زمااان وشفتو أولاد أولادكم لكن نعدكم من الليلة دى زول فيكم ح يكون عندو مشكلة عرس مافى .. وذى ما حلينا لى أخواتكم البنات مشكلتن ح نحل ليكم مشكلتكم دى

- (أصوات ) : الوعد الوعد ... الوعد الوعد

- (أصوات أخرى) : الوعد الوعد ... الوعد الوعد

- (المسئول يواصل) : نحنا حصل وعدناكم بى حاجه ما أوفينا بيها ؟

- ...............................................................................

- أيوااا ده وعد وبكرة كل واحد فيكم ح يخش ليهو (قفص) .. ومش (مرا) واااحده وبس .. كمان العاوز يتنى ويتلت ويربع ذاتو ح !!

- (أصوات) : آآآآى ده الشغل ده الشغل ... آآآآى ده الشغل ده الشغل ...

- (الكاميرا تتجه نحوالمذيع) : سيداتى آنساتى سادتى ... هل تستطيع الحكومة الإيفاء بوعدها وتزويج هؤلاء الشباب الذى إقتربو من مرحلة الشيخوخة ؟ هذا ما سوف تجيب عليه الأيام ... (يتجه نحو الكاميرا) .. الجوهر الفردى .. قناة الإخبارية .. من داخل الساحة الخضراء ... الخرررررتووووم !

إجتماع طارئ :

ما أن نزل المسئول من منصة الخطابه وغادر مكان التظاهرة حتى إتجه إلى مكتبه ودعا إلى إجتماع عاجل لمناقشة المشكلة :

- شوفو يا جماعه أنا وعدت الناس ديل أحل ليهم مشكلتهم دى فلازم نلاقى ليها حل !

- والله يا سعادتك دى المشكلة الوحيده الحلها دايمن بيكون فردى وما جماعى

- يعنى شنو وضح لينا شوية

- يعنى لو الأمور فى البلد طبيعية .. وماشة عادى ما بتكون فى مشكلة وكل زول بيعرس عااادى !

- ما قلنا ليهم الأمور كانت ما عادية والبلد كان مفروض عليها حصار ! كدى خلونا هسه طالما فى مشكلة نحاول نحلها

- أنا بفتكر يا سعادتك مافى حل غير الزواج الجماعى

- ونجيب لينا قروش لى عشرين مليون (شيله) من وين؟ القروش العندنا دى ما بتكفى

- ما مشكلة .. كل شيله إتنين إتنين من سوق ليبيا وخلاس !

- يا جماعه القصة ما قصت شيلة وإتنين إتنين .. الناس ديل ح ياكلو من وين ويشربو من وين ويتعالجو من وين ؟ هسه الناس العرسنا ليهم (جماعى) زمااان وينهم؟ ما كوووولهم إتطلقو !

- طيب والحل !

- أنا بفتكر يا سعادتك الحل إنو ذى ما إستوردنا عرسان للبنات ... نصدر عرسان لى بره !!

كل مشكلة وليها حل :

يسرنا سيداتى وسادتى فى هذه الحلقة من برنامج (كل مشكلة وليها حل) وعلى الهواء مباشرة يسرنا أن نستضيف السيد مسئول شئون الاسرة والمجتمع ليلقى لنا مزيداً من الضؤ على مشروع النفرة (الزواجية الكبرى) .

السيد المسئول لقد صرحتم بعد التظاهرات الأخيرة بأن الأيام القادمة سوف تشهد نفرة زواجية كبرى للقضاء على عنوسة الشباب ومساعدته على إكمال نصف دينه حيث أصبحت ظاهرة العزوف عن الزواج تشكل هاجساً كبيرا وتنذر بكوارث عظيمة إن لم يتم تداركها نرجو من سيادتكم إلقاء الضؤ على هذه النفرة !

- بسم الله الرحمن الرحيم والصلاة والسلام على أشرف المرسلين وعلى آله وصحبه أجمعين أما بعد : أحب أن أطمئن الجميع بأننا بصدد إبرام عدد من الإتفاقيات مع بعض الدول التى تعانى من ذات المشكلة بسبب التكلفة الباهظة لنفقات الزواج هناك !

- يعنى ح تصدروهم وكده !

- مش بالمعنى الحرفى لكن ممكن نسميها نوع من الإغتراب

- لكن يا سعادتك إذا الدول الح يمشوا ليها دى عندها نفس المشكلة وبتعانى من نفقات الزواج الباهظة ح ترضى بى عرساننا ديل كيف؟

- أيوااا ده سؤال مهم .. التكاليف الباهظة دى للمواطنين بتوعينهم لكن للعرسان الجايين من بره الزول بس بى مجهودو وكده وما بيطلبو منو أى مصاريف !

- طيب سعادتك قول ما طلبو منو مصاريف ح يفتح ليهو بيت هناك كيف؟

- برضو ده سؤال كويس .. هناك فى فرص عمل أكتر من هنا .. يعنى فى مصانع وشركات ومشاريع تنموية والزول ممكن يشتغل ويعول إسرتو ما ذى هنا !!

- (المذيعة) : ممكن المخرج يدينا مهاتفة من خارج الأستديو ؟

- (مواصلة) : آلو ... آلو

- (صوت ) : آلو .. ’لو

- (المذيعه) : أيواا سامعنك معانا منو ؟

- معاكم ( حمد ) من الكلاكلة

- أهلا (حمد) ... معاك حضرة المسئول

- قلتا ليا يا سعادتك عاوزين تصدرونا تودونا وين ؟

- والله يابنى ....

- (مقاطعا) : إبنك دى شنو؟ أنا أكبر منك

- ليه إنتا عمرك كم؟

- لمن الإنقاذ دى جات أنا إتخرجتا من الجامعه يا دوبك ! أها هسه أكون كم

- لا كان كده إنتا أكبر منى .. وما عرستا لى هسه مالك طيب

- ما لقيت ليا فرصة

- تعرس؟

- لا .. أشتغل .. هو إنتو أديتو زول فرصة !

- تيت .. تيت .. تيت ... (المذيعه) : يبدو إنو الإتصال إنقطع .. ناخد محادثة تانى

- - (مواصلة) : آلو ... آلو

- (صوت ) : آلو .. آلو

- (المذيعه) : أيواا سامعنك معانا منو ؟

- معاكم ( النور) من أم بده بالردمية

- أهلا ... معاك حضرة المسئول

- فى الحقيقة أنا بحييى حضرة المسئول عن شئون الأسرة والمجتمع وكويس إنو عرفو أخيرا إنو لو مافى (أسرة) معناتو مافى (مجتمع) وحسوا بالحالة النحنا فيها دى بس أنا عاوز أسال المسألة دى بتكلف؟ يعنى فيها رسوم وكده لأنو والله نحنا على الحديدة والواحد حق (صحن بوش) ما عندو !!

- لا لا أنا أطمئنك وأطمئن كل المشاهدين إو مفيش واحد ح يدفع مليم واحد مصروفات وإنو إتفاقنا مع الدول المستورده دى إنو العملية تتم لا (ين) لا (يورو) أقصد لا قرش لا تعريفه !!

- طيب عليكم الله مافى طريقه تعملو لينا (معسكرات تقوية) فيها أكل (نضيف) عشان (نتعلف شويه) البوش والعدس ديل هدو حيلنا ... والله كان مشينا بى حالتنا دى نفضـ....

- تيت .. تيت .. تيت ... (المذيعه) : يبدو إنو الإتصال إنقطع .. سيداتى آنساتى سادتى نواصل برنامجنا ونسأل سؤال أخير عن الكيفية التى سوف يتم بها تنفيذ هذا الحل للمشكلة؟ يعنى ببساطه كده العاوز يكون (عريس تصدير) يعمل شنو ويبدأ من وين ؟؟

البداية :

إنتشرت فى كل المدن والأحياء مكاتب (عرسان للتصدير) حيث تقوم بكافة الإجراءآت المتعلقة بتصدير العرسان إنتظمت الصفوف الطويلة الى إكتظت بمختلف الأعمار وهم يمنون أنفسهم (بالزواج) والمخارجه فى وقت واحد لا سيما لأن المسألة لا تكلف المتقدم قرش أو تعريفه كما صرح ذلك المسئول فى تلك المقابلة ، فى أحد الأحياء الشعبية وقف (الزبير) ذو الخمسة وأربعين عاما أمام الموظف بعد أن (زح) فى الصف المتعرج لساعات :

- ياخى لو سمحتا أنا عاوز أتصدر؟

- كيف يعنى؟

- شنو الكيف يعنى عاوز أتصدر (الدورى)؟ ما عريس للتصدير وكده !

- أيواا ما تقول كده من زمااان

- ما هسه قلتا ليكا .. زمان يعنى قبال ما يفتحو التصدير ؟

- طيب شيل الفورم ده وأملاهو وخت معاهو صورتين وأختمو فى اللجنة الشعبية وجيب معاهو شهادة فقر وشهاده طبية من القمسيون الطبى !!

- ماعوزنى أجيب ليكم معاهم دلبوم لغة صينية !

- طبعن ! أنت جيت هنا قبل كده وإلا شنو؟

- وده أجيبو من وين ؟

- كيفن ياخى من وين مما عملوكم تصدير المعاهد دى ملت البلد .. أهو داك البيت الناصية داااك معهد (من عرف لغة قوم) ممكن تمشى تسجل فيهو وكان غلبتك الصينية ممكن نقبل منك (لغة إشارة)

ما أن حمل الزبير فى يده (الفورم) وغادر الشباك حتى لحق به شخص يرتدى جلابية (سمنية) وشبشب ويضع على رأسه طاقية من نفس اللون :

- عاوز شهاده فقر ياخونا ؟

- قلتا شنو؟

- قلت ليك عاوز شهاده فقر؟

- هو فقرنا ده عاوز ليهو شهاده

- نديك ليها مختومة من اللجنة الشعبية بتاعت الحى بس بى عشرة ألف !

- يا زول (زح) منى كده كمان عاوزنا نبدأ حياتنا الزوجية بى (تزوير)

ما ان (زح) أب جلالبية سمنية حتى وقف أمامه شاب نحيل ذو نظارات طبية سميكة وقميص (مربعات) :

- شوف ياخونا (شهادة القمسيون) دى والله يتلتلوك فيها جنس تلتلة يقولوا ليك أفحص (العقم) تمشى تفحصوا وترجع ليهم يقولو ليك أفحص (الأيدز) تمشى تفحصوا وترجع ليهم يقولو ليك أفحص الما عارف شنو داااك !

- والفحص ده فى القمسيون ذااتو؟

- قمسيون شنو الفحص ده بس فى معامل (القرطبى) للتحاليل !

- ويعنى بكلف ذى كم؟

- بكلف ليهو ذى ميتين ألف !

- ليه ؟

- الأيدز براهو فحصو بى مية الف خلى الباقين لكن أنا بديك الشهاده دى بى مية ألف بس !

- وتخسر ليك مية ألف ! ياخ معقولة

- ما خسارة فيك ياخ يمكن تمشى الصين وتلاقى لينا شغل هناك وإلا حاجه !

- وماشى الصين ليه؟ وكت بتبيع فى الورق المزور ده بالشئ الفلانى

فى المعهد :

إتجه الزبير مباشرة إلى معهد (من عرف لغة قوم) الذى قام بوصفه له (موظف الشباك) والذى لا يبعد عن المكان كثيراً حيث وجده مكتظاً بالمتقدمين لكورس دراسة اللغة الصينية فوقف حتى جاء دوره لمقابلة سكرتارية التسجيل :

- والله عاوز ليا كورس لغة صينية ؟

- عندنا كم كورس لغة صينية إنتا عاوزا ى شنو؟ رجال أعمال؟

- لا .. تصدير !

- تقصد عرسان تصدير ؟ الكورس ده مدتو (خمسطاشر يوم) ورسومو ميتين الف

- خمسطاشر يوم دى ما شوية؟ اللغة الصينية دى فيها ميتين وخمسين حرف !

- يا أستاذ نحنا ما ح نقريك اللغة الصينية كووولها

- شنو ح تقرونى (النص) يعنى ؟

- لا ده كورس لغرض معين يعنى for specific purpose ح نقريك فى الكورس ده المفردات والجمل البيستخدموها العرسان وبس !

- ودى عاوزه ليها كلمات وجمل بى ميتين ألف ؟ طيب ما أستخدم لغة الإشارة؟

- لغة الإشارة الكورس بتاعا عندنا بى تلتمية ألف

وإكتملت الأوراق :

لم يكن لدى (الزبير) مفر من بيع (الركشة) التى (يسترزق) منها من أجل تكملة وتجهيز كل الأوراق المطلوبه ليلحق بأول قائمة (عرسان تصدير) ويحقق حلمه بالزواج كأى شاب تقدم به العمر خاصة وأن الركشة غير مرخصة وتحتاج إلى عمرة كما إنه لن يحتاج لها بعد أن تظأ قدماه الصين ، بالفعل قام الزبر ببيع الركشة لأول مشتر وبدأ فى عمل الإجراءآت وبعد أيام قضاها متنقلا بين الصفوف ما بين معاهد تدريس اللغة الصينية والقمسيون الطبى ومعامل (القرطبى) للتحاليل الطبية عاد لمكتب (عرسان تصدير) لتسليم الأوراق ووقف أمام موظف الشباك بعد معافرة :

- دى (الفورم) بتاعكم مليتو وختمتو من اللجنة الشعبية وديل الصورتين وده الفحص بتاع القمسيون الطبى عملتو عند ناس القرطبى ودى شهاده فقر من اللجنة الشعبية وكمان معاها شهاده سكن وده دبلوم اللغة الصينية !

- وين طيب الصورة بتاعت جواز السفر بتاعك !

- سفر شنو؟ إنتو ما قلتو ليا

- دى عاوزة ليها يا أستاذ قول؟ إنتا مش ماشى الصين ؟

- أيوه ماشى ؟ جواز سفر شنو أصلو أنا ماشى بعثه ! ما كفاية يا جماعة قروش (الركشة) قربت تكمل

- يا أستاذ الصف ده طويل وما تعطلنا ساااكت شيل ورقك ده وجيبو لينا ومعاهو صورة من جواز سارى المفعول !

- والجواز ده رسومو كم لو سمحتا !

- 400 ألف ! لكن عندك بطاقه ؟

- لا ما عندى رسوما كم

- 150 ألف !

- لكن ما ح يطلعو ليكا البطاقه لو ما عند جنسية !

- والجنسية بى كم؟

- 175 الف !

- وعشان يا أستاذ ما تقول ليا بعدين ما كلمتك وما قلتا ليك بعد ما تعمل الحاجات دى كووولها تمشى وكالة (الطير الأبابيل) تقطع ليك تذكرة ذهاب وأياب للصين

- ودى بى كم ؟

- ألفين وخمسمية !

- جنيه ؟

- يورو !!

كسرة :

وأنت تمر داخل برندات شارع الجمهورية إذا أقترب منك شخص أشعث أغبر شكلو (ودناس) وإستوقفك متسائلاً :

- بالله يا استاذ ألفين وخمسميت (يورو) بيعملو كم ؟

فلا تعتقد أنه (سمسار عملة) .. إنه (الزبير) من أوائل المتقدمين لمشروع (عرسان تصدير) والذى حلم بأن يقترن(بصينية) فتحقق حلمه بإعتلائه(صينية) سانت جيمس !

منقــــــــــــــــــــــــــــــــــــــــوووووووووووووووووووووووووووووووول

proff_khibra 15/8/2009, 17:41

أها . . رايكم شنو ؟!!!

**d.sombola** 15/8/2009, 17:51

هههههههههههههههههههههههههههههههههههههههههههههههههه
والله ي خبره
الله يخليك وتنقل لينا
طبعا

proff_khibra 15/8/2009, 18:09

مشكوووووووورة d.sombola على المتابعة ..
و منقوووول دي لزوم الاجازة و (انتظار الاجازة ) و كده . . .
بس موعودين بي مواضيع (قديمة لنج) في اليومين الجاييين ديل انشاء الله . .
وزي ما قلتا ليكي بس (نأجز) !!!!!!!