أهـــــــــــــــــــــــــا . . طَلـَعت كم ؟!!

عوضين . . رجل بسيط . . تجاوز (الستين) من عمره بقليل . . تزوج من بنت عمه (عوضية) منذ ثلاثة عقود . .وأنجب منها أربعة أبناء و(بنت) واحدة . . ومنذ بلوغه سن (المعاش) أصبحت اهتماماته متجهة (صوب) الرياضة . . وتحديداً كرة القدم . . وبالأخص تجاه نادي (النجمة) والذي يشجعه (بالوراثة) أباً عن جد . . ولكن ونسبة ً (للفراغ) الذي يعيشه في الآونة الأخيرة زادت حدة (هوسه) بالنجمة لدرجة لا توصف . . وذات صباح :
ــ (سجم خشمي) . . عوضين . . انتا لسة نايم . . قوم يا راجل ! !
(ينهض متثاقلا ً )
ــ مالِك يا (ولية) . . في شنو ؟!!
ــ (كيفن) مالي . . انتا ناسي انو الليلة يوم (سبعة) في الشهر ! . . قوم أمشي (المعاشات) شوف معاشك ده طلع ولا لسة . . (هسي) عباس راجل سعاد جارتنا دي من (الدغش) طلع كايس (معاشو) !!
ــ عباس (التلالابي) ده ما تجيبي لي (سيرتو) . . ده زول سلام الله ده كتير عليهو . . وبعدين تعالي هنا شنو طوااالي المعاش . . المعاش . . والله معاشهم ده مواصلات للإستاد (سااااي) ما بيكفيني !!!
(تقاطعه) :
ــ البركة (يا يمة) في ولدي الكبير (حمزة) . . من ما إغترب شهر واحد ما (عدّى) إلا وبيرسل مصاريف البيت. .
ــ تعبنا زمان . . خليهو يعيش (نُصّ) التعب (التعبناهو) . .
ــ لكن (لمتين) . . (الود) داخل علي عرس يشوف نفسو ولا يشوفنا نحنــ . .
(ويرمقها بنظرة وهو ينهض من على (السرير) جعلتها تبتلع (ريقها) بما فيه من بقية كلام) :
ــ افتكر الموضوع ده اتكلمنا فيهو كتير . . ومافي (داعي) نعيدو . .
ــ طيب بالمناسبة دي . . ما تسى وانتا جاي تجيب معاك (بارد) وكيس (حلاوة) نستقبل بيهم الباشمهندس (سفيان) . . رحاب (بتّك) قالت جاي الليلة عشان يقرا (الفاتحة) . .
ــ ح يكون أحسن من (القبلو) في شنو . . غايتو الفيهو الخير يقدمو ربنا . .
وفي المساء :
(يندهش سفيان للـ(وهلة) الأولى عند دخوله منزل عوضين فقد طلي باللونين (الأحمر) و(الأصفر) وامتلأت جدرانه بالصور والملصقات فبدى وكأنه معرض (لأرشيف) نادي النجمة ) :
ــ أهلاً وسهلاً . . اتفضل . .
( (يدلف) سفيان ويجلس على أقرب مقعد في الديوان ، ويجلس أمامه مباشرة عوضين وقد وضع نظارته على (المنضدة) أمامه . . (يسود) الصمت لحظات . . ثم تدخل (رحاب) وتسلم على إستحياء ، وتضع أمامه وهي (ترتجف) واجب (الضيافة) وتخرج مسرعة ) :
ــ طبعا ً يا حاج . . في الحقيقة يعني . . أنا كنت عاوز . .
ــ أيوه يا إبني . . اتفضل. . عاوز تقول شنو ؟!
ــ بصراحة . . أنا كنت عاوز أطلب يد بتك (رحاب) . .
ــ أنا عارف كدة . . (أها) وبعدين ! ! !
(لم يتعجب سفيان لهذه المقابلة فقد نبهته (رحاب) إلى أن والدها (دمو حار) وما بيعجبو (الضل الميت) ) :
ــ مافهمت عليك . . يا حاج ؟!!
ــ يا إبني قصدي (مؤهلاتك) شنو ؟ . . بتشتغل وين ؟ . .بتاخد كم ؟. . كدة يعني . .
ــ والله يا حاج . . أنا بشتغل مهندس في شركة (تستنكحون) الهندسية لي سنتين ، وباخد في الشهر (اتنين) مليون جنية (بالقديم) . .
ــ قلتا كم ؟ !!!
ــ ات . . نين مـ . . مليون جنيه . .
(يضحك عوضين بصوت عالي (ساخرا ً) ) :
ــ والله (مرتبك) ده . . حافز (تمرين) ساااى لعيبة (النجمة) ما بيقبلو بيهو ! ! !
(خرج سفيان غاضبا ً بعد هذه (الإهانة) التي تعرض لها ، وكان أول ما فعله بعد خروجه أن أمسك بهاتفه الجوال وأرسل رسالة نصية إلى (رحاب) كانت بمثابة انتهاء العلاقة بينهم . .قال فيها :
ــ غايتو أبوك ده إلا يعرسك لي (فاولينو) . . أقصد (باولــــينو) . . ها . . ها . . هااااا*جزء من النص مفقــود*
قطيــــعة ساااااي :
(وضعت عوضية صينية (الجبنة) أمام جارتها (نبوية) والتي بادرتها بسؤال مستفسرة) :
ــ انتي يا عوضية (ياختي) . . ما مشيتي لي (حنان بت التوم) قريب ده ؟!
ــ لا والله يا (بت أمى) . . (عاد) طولت منها جِنِس طول . . ليه خير انشالله ؟ !!
ــ اسكتي مش قالو (راجلا) رمى عليها (يمين) الطلاق . .
ــ الرسول (لأ) !! . .وبعد (عُمُرن) ده كلو . . ليه (أصــِلا) عملت شنو ؟!!
ــ (برِي) ما عارفة ! . . لكن سمعت (تحت تحت) قالو بي سبب كورة (النجمة) الفاتت دي . . أصلها كانت (وكِت) الكورة في بيت ناس اختها . . ورجعت من هناك بي (تاكسي) !!. . و(العجب) أكان شفتي ما كان معاها (حق ّ )المشوار . .فإنتظرت (ابو القاسم) راجلها في الباب لحدي ما رجع من (الإستاد) . . (اصلو) قال ليكي رجع زهجان جنس (زهجة) . . قام سأل بتاع التاكسي حق ّ المشوار كم ؟ قالّيهو بي (ستة) جنيه بس . . عشان يتخارج منّو قالو دخـّل ايدو في جيبو عشان يديهو (القروش) . . (الغبيـانة) نطّت وقالت (ستة) جنيه كتيرة من بيت (اختا) لحدي هنا . . قاليكي (أبو القاسم) من (زهجتو) ما (عبّرا) . . و(ناول) الراجل قروشو . . قام (السواق) رجع ليها جنيه (واااحد) عشان (نقّتــا) . . وبس (ياختي) . . استلمت الجنيه (الواااحد) من جهة. . واليمين نزل عليها من جهة !!!
ــ لا والله . . لكن بالغ معاها (عديييل) كدة . . حسي ده سبب عشان يطلقها !! . . (واجبن) علي أزورها . . (أنّقوم) نلبس (التوب) ونجيكي . .
(كان عوضين والذي يرقد بالغرفة المجاورة قد استمع للحديث الذي دار بين زوجته وجارتها ، فصاح مناديا ً :
ــ ياعوضية . . انتي يا (ولية) . .
(جاءت عوضية مسرعة وهي تحاول ربط (التوب) حول وسطها ) :
ــ آآآآآي يا راجل . . في شنو . . بتنادي مالك ؟!!
ــ اسمعيني هنــا . . انتي طااا . .
(قاطعته) :
ــ (هييي) يا راجل كدي قول بسم الله . . انتا (جنّيت) ولا شنو ؟!! . . أنا ماكان (قصدي) حاجة . . حنان (عيشتا) تطير انشالله . .
ــ ليه بس ؟! . . يعني انتي كنتي (ماشة) ناس (حنان) . . أنا كنت عاوز أسألك بس : انتي طااالعة ماشة وين ؟!
ــ ما تقول (كدي) . . (كتلت) قلبي . . ايوووي يوووي يووي . . لا ما(ماشّة)حتة . . خليتو . . (سجمي) خلّيتو . . .
يوم الرجــال :
(لم يستيقظ عوضين صباح ذلك اليوم لأنه أصلا ً لم (ينم) ، وظلّ طوال الليل يفكر في ما (ستؤول) اليه نتيجة مباراة (الغد) والتي تعتبر بمثابة (فاتحة شهية) للمرحلة المقبلة ، و (رد اعتبار) للمرحلة الماضية . . وما أن (بعثت) الشمس بأشعتها الأولى . . حتى صاح مناديا ً :
ــ يا ولية . . انتي شاي (الساده) ده لسه ما طلع ! ! . .
ــ (هييي) يا راجل كدي قول بسم الله . . طالع ماشي وين زي (الوكت) ده ؟!!
ــ أنا من دربي ده وعديييل على (المفخرة) !!
ــ يعني (خلاس) لقيت شغل (تاني) واتوظفتا ؟!!
ــ شغل شنو ياخي . . الليلة كورة (النجمة) و(التلال) . .
ــ انتا ما (تبتا) . . مُش الدكتور قال ليك ترتاح (ليكا) اسبوعين عشان (ضغطك) المرتفع من (يومتا) ؟!!!
ــ (ضغط) شنو و (تاني) شنو . . انا (امبارح) دي جمال (الجالّي) شخصيا ً اتصل بي . . وأكّد علي انو لازم (أقود) التشجيع من المدرجات . .
(قالها ولم ينتظر رد عوضية فقد ارتدى شعار فريقه (النجمة) وحمل علما ً كبيرا ً وخرج مسرعا ً نحو الباب وأغلقه خلفه في (حماس) وهو يردد :
ــ الليلة مقدرة . . (مفخرتنا) حلــــــوة حــــــــــــــــــلا . .
(في تمام العاشرة صباحا ً كان عوضين قد أخذ مكانه في المسطبة الشعبية لإستاد (النجمة) . . وبالطبع فهو لم ينس شراء (صحف) النادي والتي يقرأها بالترتيب ابتداء ً من جريدة (الندّى) وعمودها (فشفاش الحقيقة) وانتهاء بصحيفة (الشوبَر) . . مرّت الدقائق والساعات . .وعوضين لم يتناول طعام (الفطور) أو (الغداء) ولا حتى (شاي الصباح) في انتظار بداية المباراة. . وبدت علية علامات التعب والإرهاق مع ازدياد الأعداد (الغفيرة) من الجماهير . . ودخل الفريقان أرض الملعب لإجراء عمليات (الإحماء) والكل يردد : هيبة يالنجمــــة هيبة يالنجمــــــة . . ومع (صافرة) الحكم لم يتحمل عوضين مشاهدة المباراة لأن ضغطه كان قد ارتفع لدرجة جعلته يسقط على الأرض (مغشيا ً عليه) . . و . .
بعد اسبوع :
(جلست عوضية ورحاب واشقائها الثلاثة بالقرب من عوضين الذي يرقد بمستوصف (يستشفون) الطبي ينتظرون (افاقته) من هذه الغيبوبة التي استمرت منذ ذلك اليوم . . وفجأة . .بدأ عوضين بتحريك يده (ببطء) . . وفتح (إحدى) عينيه . . وكان كل ما يتذكره (صافرة الحكم ) . . وبدأ (يتمتم) بصوت (خافت) وبنصف (وعي) :
ــ أنا وين . . . (المفخرة) . . . أهـــــــا طلعت كم ؟ !!!!!!



كســـــــــــــــــــــــــــرة :
لمن يرغب في زيارة عوضين الرجاء مراجعة منظمة (حسن الخاتمة) فرع (أحمد شرفي) . . والله يكضب الشيـــــــــــــــــــــــــــــــــــــــــــــــــــــــــنة !!!!!!!!!!!!!!!!!!!!!!




جميع الحقوق محفوظة proff_khibra 2009

هاهاهاهاهاهاهاهاهاهاهاهاهاهاهاها ..شكلو باكر في ناس كتيرين حيبقو زي عوضين وضغطهم حيرتفع .. تسلم يا دكتور ..

آسف على الغيبة الطويلة دي و
مشكوريييييين د. عروة و د. أريج على المرور . .
انتو المنتدى ده ما فيهو أسيـــاد بلد كتار ولا شنو ؟!
غايتو التكــــــــــاسة مرقو بي كرامة البليلــــــــــــــــــة !!!

تااااااااااااااااااااااااااااااااااااااااااكسي لزيارة عوضين بيشيل مني كم تفتكر يا خبرة

غايــــــــــــــــــــتو لو انتا في (مدني) التاكسي التعاوني أو (الأهلي ) زي ما بيسموهو في (حِتات) تانية بي نقطـــة (وااااحدة) برضو !!!
حـِــــــــــــــــــــــــــــــــــــــــــــــــــــــــــــــــــــكـَـــم !!!!!!!!!!!!
حسي يا (بوب) عليك الله ( تاكسي) شنو في (المطر) ده !!