بت صيدله شعر

دي بنيه جاطت بالرويس
نافوخي طشه تخلخلا
سرحان عايش في فراغ
كل حياتي في تلتله
يا احلي من فوق الوصف
قمره في بت متمثله
ملتوقه من طبع الربيع
شذي ناثر صندلا
قشطه عسل نقط دفاق
خليه بس متنحله
سجمتني في عيشة الرماد
براح ملان بالبهدله
انا امشي اسكر ديمه لط
اعمل دماغ اتستطلا
ولا اكورك للبشير
ريسنا حل المشكله
ريسنا سيبو الانفصال
لملم حكومتك وحللا
احرق جنوبنا مع الشمال
ما مشكله
ريدتنا بس هي المشكله
ما البنيه ماشبه البنات
معاني دايره نفصلا
إيديها لمسات من حرير
موية نار عديل متشعلله
وخدودها بس باقت ورود
وعيونا فاتنه مكحله
وخصلاتها ليل وسواد
تحت القدم
لامس الارض متدللا
وبسماتا حاجه من خيال
وروني كيف اتحملا
ما انا في غيابا
عايش في ضلال
وحالي خلاص حال البلا
كأني مصاب بي جنون
او شبه امراض الكلى
لكن معاها حالي غير
تلقوني جاري مهرولا
انطط براي من الفرح
وحالي خلاص مخجلا
يوم داك
شايف هناك بت صيدله
حور عين عديل مع بشر
من الجنة شارده منزلا
مشيت عليها
قلت اشوفها واقابلا
لكني ما قدرت زي زمان
هارب من عيونا الكاتلا
مشيت صليت لي ركعتين
للخالق بقيت اتنفلا
وتاني صليت لي ركعتين
ده كلو شان اقدر اصلا
وبقيت بسأل عليها في الشباب
يا ناس وين بت صيدله
واحد ظريف قال لي هداك
قمر السما زايد حلا
مشيت عليها بي ثبات
مازول قاري الكهف و يس في الصلا
وكنت شايل في ايدي ديك
ادوات رسم
مسطره ومثلث ومنقلا
نسيت انو السلام بالايد
فاكر السلام بالمنقلا
مديت المثلث شالتو
ختت معاهو المنقلا
راسي كبس ما فهمت شي
اموري بقت متنيلا
وقلت آخد لي نفس
ارتاح شويه واسالا
كيف هي ماشه مع الحياه
وكيف معاها الصيدله
ردت بدون تكبر وتعالي
اموري باسطه معسلا
ومشينا سوى جمب الظلط
وهي كيف زاهيه مكملا
ربيع يمشي على رجول
ساحرات ورودو المزهله
صيدة تغدو بي مرح
خطوات رزينه ممهلا
في وكتنا داك
لاقانا انصار سنه
آاي عمك اب دقن
دقنو كتيره عاملا
صاحبك كشف يمين
كشف شمال
لاغض بصر
ولا ولا ولا ولا
فتح عيونو وزغللا
الفاره رجع حلق دقنو ديك
وجانا حالق كارلوبيس
رجيع ورا وفلفلا
لابس سستم بي فهم
ود نيقز عديل
قال لي بحب بت صيدله
قال لي كنت داقس من زمان
في الجوامع هناك متعزلا
ثم تاني ديك بدع
احاديث ضعيفه وجاهلا
وريت صاحبك بالحصل
مابراو بحبها
كلنا بنحب بت صيدله
عميد الكليه زاتو بحبها
حالف يمين ما يخرجا
في الجامعه تقعد قبلا
يابت صيدله كان للعميد ما مشكله
بكره بجيك متوسلا
المشكله ريدي ليك
فات الحدود وكملا
انا امش واجن زي قيس
وامشي اهيم في الخلا
ولا امشي واكورك على الملا
واقول بحب بت صيدله

قصيدة طريفة وجميلة جدا
في انتظار جديدك دوما

اخي عروه التحيه ليك وللجميع !اكيد حنشارك معكم بي إجتهادات نأمل ان تنال رضاكم!تشكراتي ل مرورك