مــرض . . حـــــمدي !!

بداية القصــة :

كعادتها صباح كل يوم ، قامت حاجة (التومة) بعد وضعها لـ(بــراد) الشاي على النار بالتوجه صوب غرفة( الأولاد) . . والتي أضحت منذ ما يقارب العام غرفة (حمدي) ــ آخر عنقودها وطالب السنة الأولى بالكلية المرموقة ــ لوحده بعد أن غادرها اشقاؤه الثلاثة بين مغترب ودارس بمدينة أخرى وثالث قد أكمل نصف دينه :


ــ يا ولد حمدي . . انتا لسة نايم . . الساعة بقت سبعة . . قوم عشان تلحق محاضراتك . .

ينهـض متثاقــلا :

ــ لأ ما تسويهو لي يا (حاجة) . . أنا (اتعشيت) بــره ! !

ــ (عشا) شنو كمان ؟! . . يا ود انتا (حلمان) . . قلتا ليك قوم اصحى . . انا (مركبة) ليكا الموية دي في النار . . اعمل ليك الشاي ده (سادة) ولا بي لبن ؟

ــ مش باب الشارع ده . . خليهو يا (حاجة) انا ح اقفلو . . بس انتي خشي نومي وما تشيلي همو ! !

ــ سجمي !! . . الود ده الليلة ماااا طبيعي . . يا ربي يكون شايلو (حمار نوم) . . كدي النمشي نلبس التوب نلحق بتاع (الخدار) ده من بدري . . قال شنو . . قال باب الشارع قال ! ! !




وفي الأثناء كان حمدي قد ارتدى ملابسه وحمل حقيبته ومعها مصروفه اليومي والذي وضعته له الحاجة بجانب (كباية) الشاي وخرج مسرعا نحو محطة الحافلات ، والتي ولحسن حظه استطاع ان يستقل احداها ، والتي ما ان صعد عليها و جلس في مقعدها الأخير حتى صاح فيه الكمساري مطالبا بالأجرة :

ــ ها ارح يا (اب شنطة) . . الفي (الكورنا) . .

ــ شنو يا (حاجة) . .هي متين صبحت . . خلاص (قمتا) ! !

ــ عليك الله يا (ولدنا) الدنيا صباح وما دايرين معاك مشاكل . . أمور الطلبة دي ما بتنجح معانا هنا يا (أصلي) . . ادينا حقنا وبس . . انتو قايلين الشغل ده ماشي بي (موية) ولا شنو ؟ !

مناولا الأجرة للكمساري :

ــ طيب عليك الله ما تخليها (تغلي) ! ! وخليهو (سادة) يا حاجة . . ومعاهو باقي القروش بتاعتي ! !



مرض جديــد :


بينما كانت حاجة (التومة) تقوم باختيار مكونات (السلطة) وبجانبها جارتها (سعاد) والتي وصلت بعدها لذات الغـرض :

ــ انتي يا (سعاد) ياختي . . مالك الليلة متأخرة كدي . . ماااا من عوايدك . . يومي انتي بتجي هنا قبلي . . وتشتري حاجتك وتمشي . . (نعلو) ما في شي ؟ !

ــ (بري) والله يا يمة . . بس كنت فاتحة (الراديو) وبسمع في النشرة . . انتي ما سمعتي بالمرض الجديد الطالع اليومين ديل ؟ !

ــ لأ والله ! ! . . مرض شنو كمان ؟ ! . . ما كل يوم بقى يظهر مرض جديد . . شي طيور . . وشي خنازير . . وشي ما بعرفو شنو داك ! ! . .

ــ اسكتي ساااي . . قال ليكي ظهر مرض جديد وغريب كده في كم بلد من بلاد (بره) ديل . . من يجي للواحد يخليهو كده . . يخليهو زي التقول . . هسي دي يشرحوها ليكي (كيفن) عاد . . ايواااا يخليهو كده زي الــ (فاطي لقطة) !!

ــ كيفن يعني ؟ . . ما فهمتا منك حاجة ! !

ــ زي ما بقول ليكي كدة . . يعني بيبدا (يجمع) بعد مساااافة . . مثلا لو قعد ليكي في التلفزيون عشان يحضر المسلسل ساااي . . بينطق رقم الحلقة بعد ما (خديجة) تكون وقعت من البلكونة ! ! . . أو كمان (نادية) ديك تكون رجعت مع العفش عديييل ! ! . . وده لو حالتو بقت متأخرة شديد . . كدي فهمتي ؟ ! !

وهنا تذكرت حاجة (التومة) تصرفات ابنها الغريبة هذا الصباح :

ــ وووووب علي . . ده قفل ( باب الشارع ) الليلة الصباح . . لازم الحق البيت اكلم ابوهو ده يطلع يمشي يحصلو قبل ما يعمل ليهو مصيبة ! !

وفي جانب آخر :


طرق (حمدي) باب القاعة والذي وجده مفتوحا على مصراعــه (ضلفة واحدة وكدة!! ) ، والتي امتلأت عن آخرها بحشود من طلاب الدفعة (والدفع التانية كمان) بعد ان ألغيت محاضرة ذلك اليوم بسبب زيارة وفد من (المركز) للكلية المرموقة لبحث مشاكل الطلاب (الخدمية) وسد (احتياجاتهم) في المرحلة المقبلة ، فوجد له مكانا في آخر مقعد في القاعة عند الزاوية ، حينما أمسك رئيس الوفد الزائر بالمايـك :

ــ بسم الله . . والصلاة والسلام على اشرف خلق الله . . أما بعد . . نفتتح باب النقاش مع ابنائنا الطلاب حول مشاكلهم واحتياجاتهم . . والاختيار بيناتكم ح يكون (عشوائي) . .وممكن نبدا مثلا بالطالب اللي وصل متأخر قبل شوية . . ايوة انتا اللي قاعد في الركن هناك . . عرفنا بي نفسك اول حاجة . .


ــ شنو طوااالي كده يا (بن العم) جاري علي (الكورنا) !! . . انتا قايلني ح (آكل) حقك . . ولا كلامك ده كيف يعني ؟ !

ــ لأ انا ما قصدت حاجة يا ابني . . نحنا جينا هنا من الصباح . . عشان نسمع منكم مشاكلكم ونحاول نحلها ليكم في المستقبل (القريب) ان شاء الله . . عشان دي حقوقكم . . وهسي لو عندك اي حاجة بتشتكي منها قولها . . ونحنا الشايفنا قدامك ديل كلنا (آذان صاغية) . .

ــ ياخي انتو (فضلتو) فيها صباح ولا مسا ! ! . . ما اليوم كلو طالعين نازلين (بتلقطوا) في حق الناس ! ! . . والمشاكل دي انتو (براكم) القاعدين تجيبوها لي نفسكم ! ! . . وثم ثانيا كيف يعني الطلبة ما بينجحوا معاك ؟ ! . . يا (زول) اعمل حسابك انا كان (لحقتا) حصلتك هناك ما بيفكونا من بعض الا في (النقطة) ! !

بسرعة قام مجموعة من الطلاب المحيطين بـ(حمدي) بمحاولة سحبه خارج القاعة ، تفاديا لوقوع اشتباك بالايدي ، ولكنه امرهم بتركه ثم انفجر ضاحكا :

ــ بالله هي الموية ذاااتا وينها اللي ح يمشوا بيها (الأشغال) دي . . والله انتا ما عارف حاجة ساكت ! ! . .


خرج حمدي لوحده من القاعة والتي ترك أفرادها في حالة من (الحيرة) والدهشة لتصرفاته الغريبة ، واتجه صوب المكتبة والتي وجد بها (سوسن) الطالبة معه بنفس الكلية _ والتي احبها (والضمير يعود للطالبة!!) و يبدو انها كانت تبادله نفس المشاعر ولكنه كان مترددا ( في انو يطرح وكدة) _ فقد كانت تنتظره بـ(فارغ الصبر) وقد حضرت للجامعة في ذلك اليوم بكامل أناقتها وهي في شوق لمعرفة تفاصيل الموضوع الذي كان قد وعدها في اليوم السابق عن طريق (الجوال) بأنه سيحكي لها عنه (شكلو خلاص بيت النية ) حال وصوله غدا (اليوم) :

ــ صباح الخير (حمووودي) . . شايفاك مبسوط الليلة . . ممكن اعرف السبب بتاع الفرحة دي ؟ . . و كمان الموضوع اللي كنت عايز تكلمني بيهو ؟ . .

ــ أول حاجة أنا اسمي (حمدي) ! ! . . وموضوعك البتتكلم فيهو ده انا ما عارفو . . عشان يادوب جيت هسي . . ممكن تعيد (تاني) لو سمحت ؟!!


في اندهاش :

ــ انتا مش (امبارح) دقيت لي ! ! . . وقلت عندك موضوع مهم عاوز تكلمني بيهو . . انا هسي (دكيت) المحاضرة بتاعتي عدييل . . عشان اجي واسمع موضوعك ده ! ! . .

ــ (طبعن) نحنا بقى عندنا مشاكل كتيرة خلاص . . انا وانت عارفنها كويس . . ومافي داعي نقولها هنا قدام الناس . . وابسط حاجة لو الواحد مثلا داير يعمل اي (نشاط) في البلد دي . . ح تقدر تشاركني فيهو . . اكيد لأ . . وبعد ده كلو كمان بي ياتو (وش) تجي و تقول مستقبل (قريب) ! ! . . والله نحنا (التفاهم) بيناتنا بالطريقة دي بعد ميتين سنة ما ح يتم . . عشان كدة . . و عشان ما أعمل معاك (شوشرة) على الفاضي ساكت . . انا (شايف) انو احسن امشي واسيب ليك باقي الدفعة احتمال (مواضيعهم) هي التنفعـك !!!




كســــــــــــــــــــــــــــــــرة :


أفيدكم علما بأن (حمدي) قد تعافى تماما تماما من ذلك المرض فقد كان اول شخص يقابله بعد ذلك المشهد هو (حاجو) ذااااااااااااتو ! ! !

لكن ما تسألوني عن ( سوسن ) !!!



جميع الحقوق محفوظة proff_khibra 2010

ههههههههههههههههههه ابداع والله
الحمد لله العدوى حقت المرض دا ما أنتقلت لزول تاني ووووووو
انته على كده
شكرا لك يا أخي

ما قلنا ليك يا مهند ما تسأل عن سوســـن دي . .
هسي كان في داعي يعني ؟ !!!

هاهاهاهاهاها .. مبالغه دا شكلو بيتعاطي كنابينول .. تسلم يا خبرة

الله اعلم يا سمبله

ويا خبره قلل الدوس شويه
بصراحه ابداااااااااااااااااااااااااااع

يا عروة انتا قاصد منو اللي بيتعاطى الـ(كنابينول) ده حمدي ولا زول تاني ؟
ويا سمبلة (لازم تحرجونا يعني ؟) عشان كدة أنا قلتا انو بيقرا في سنة أولى (يرلوم وكدة) يعني يا حمووودي ما تتحسس

اما انتا يا أحمووودي ( ولاحظ للألف دي كوييييس )
فنصيحتك دي على العين والراس

ومشكوووووووووووورين على التعليق كلكم ذووووووووووووق
>>> to be continue

والله ابدااااااااااااااااااااااااااااااااااااااااااااااااااااااااع
بس مافي انتي حامدي
انتي حمدي اتمني ان يكون مشروع تخرج ناجح هاههاهااهههههههههههههههههههههههههههههههههههههههه تسلم يابروفسير خبرة جد كيفتني

علي الطلاق يا محمد عمر ما فهمتا منك اي حاجة !!!

معليش يعني عشان الليله عطلة وكدة !!
لكن يا زول ما عندك اي مشكلة مشروع تخرج . . تخرج .. وين المشكلة ؟

(م.........ن ) و (خ............ل) و (مبببببببببدع )


والاولى والتانية ,,,,,, انا ذاتي قلتة كدة

اما التالتة دي ياها ذاتا والله مافيها اي كلام .


والجامعة اكيد ماجامعتنا عشان ماعندنا مشاكل بتتحلا اقصد اصلا ماعندنا مشاكل ,,,


وسوسن لو بقت ساكنة في حتة بعد الكبري المقفول ,,, تبقى مصيبة ,,, ولا كيف ي عبادي؟؟

ابداااااااااااااااااااااااااااااااااااااااااااااع
_____________
ود عمر جاري يلحق العقد بتاع بت الجيران معزووووووووووووووور

لاالالالاالا
الحق بت صيدله انفتحت
اللهم لاشماته
ولا.....................هناي
عاين ي خبره
وبي نفثثثث الاثثثبع
شنو قلت شنو؟؟؟؟؟؟؟؟؟؟

ي اختنا انتي يا الفي الكورنا ,,, اي انتي ذاتك ,, البص بص سيرة هاك باقي قروشك وانزلي .

الكلام ليك ي ثمبلة

(م.........ن ) و (خ............ل) و (هـ ............ش) !!
التالتة دي نسيتيها ليه !!
ولا عشان ما اتقالت في الكواليس !!

وسوسن دي لو كانت ساكنة ورا الكبري المقفول كان ح يكون (عااااااااادي) !!!


_____________
ود عمر اشتغلت (مأذون) ولا مشيت ..... في الليلة دييييييييك !!!

ويا ثمبلة تقولي شنو بثثثثثث !!!
ولا تاخدي في بالك (طبعن) ديل
(المعجــــــبين) ودوشتهم !!!

ويا آلاء بذكرك بي (هـ...........ش) دي للمرة التانية !!!!