قام تاني جاب سيرة البحر

هذه القصيده قيلت في احد طلاب جامعة الخرطوم في واحد اخونا اسمو (عبدو المشكوكش) وكان بحب واحدة لدرجة الجنون وكان خجول جدا فلمّا حكى لزميله في الداخلية عن قصة البنت دي نصحه زميله بأن يفاتحها في الأمر ، فرد عبدو "حفضل أكهربها ليك لو جا ملاك يخطبها ح ترفض وأحسن أكون تقيل أنا زول جميل وقيافة " ...
وفضل يغش في روحو الاهبل لحدما جاء واحد زي ناس ... من امريكا يايمه وطير ليك المكنه من راس اخونا عبدو ..ويلا نشوف عبدو بعدما كهربتو زادات بقي عامل كيف ؟؟ .....طبعا القصيده دي محتفظ بيها من زمن من واحد اخونا الله يطراهو بالخير اسمو(..)...تحياتي ليهو

سائل الله يحصل فيك نفس الفلم ده ياخالدونا ياكسار التلج

في الليلة ديك القصة ذاتا بقت عليك

يا عبدو وأدوك الشريط

يوم قولنا ليك أنضم معاها وكلّما

أبيت تسمع كلامنا وبقيت لميض

وقلته أحسن أكون تقيل أنا ما جميل


وبقيت تقيل لامن سقوك موية الغسيل

وجيت تنطط زي زمان وتباري بقعور الشجر

كايس كراسي الخيزران ..

وقعدته يا زينة الرجال.. كهربجي قال

رفعوا الستار والبت تجي ومرات تقيف

ومعاها يا زول ولداً حريف

والوقفة كانت وقفة وِلِف

صاحبنا بالاحساس عرف

سألتَ والناس كلّموك

ووقعتَ في شارع الزلط

تبكي وتجعّر والعيون اتورّمت

ويد القميص ضهر القميص كم القميص

حتى الفنيلة اتشرّطت

يا عبدو عيب

قوم ياخي صلي على الحبيب

الواطه صبحت داير ننوم

يا أخوانّا لأ أنا عايز أموت أقع البحر

يا عبدو عيب

الدنيا حر .. والموية بتسخّن عليك

ثلاثة ساعات زولنا يسب ويكيل

ودموعو سايلات بالكفوف

وشرايطو تلمع في الكتوف

بقى فيلسوف

في علاقة بين يوم السبت وعين الحسود؟!

ومقارنات بين الجمال!!

و الجهل وسوء الإختيار

قال شينة قال ...!

قال شينة قولنا كلام صحيح

وخطيبها زاتو ولد قبيح

بس ياخي قوم الواطة صبحت دايرين ننوم

قام تاني جاب سيرة البحر

قام تاني جاب سيرة البحر

قال تقيل وجميل قال

ومن هذا المنطلق ننصح اي زول عندو حاجة محرقاهو وعاملة ليهو آآكولة في روحو اتجاة زول معين احسن يكملو.. وبعد كدة يا الاكولة راحت او بقت حساسية عديييييييييل كدة ... وبرضو احسن من سيرة البحر .. وخلوا شغل الكهرباء للكهربجية .


مشكوووووور

هاهاهاهاهاهاهاهاهاهاهاها .. مبالغة .. ياتبقي تقيل وتتحمل الحتجيك يا يسقوق موية الغسيل مافي أي خيارات أخري !! اللهم قنا شر الشواكيش .. وكل ما يقود إليها يارب العالمين .. آمين