طقوس احتفائية العيد بمنطقتك اومدينتك؟؟؟؟

ما هي اهم طقوس العيد من الصباح والصلاة و............
اتمني تفاعل الجميع لنقل ثقافات وعادات كل بلد
وتسلموا يا رائعين
كل عام وانتم بخير

إممممم ( دلالة علي التفكير العميييق جدا ) .. الطقوس السودانية هي ذاتا منذ القدم نفس الروتين مع بعض الرتوش التي تتفاوت من منطقة لأخري .. هناك من يسافرون و يعيدون خارج مناطقهم عند أهلهم .. طبعا حمام الصباح ثم الصلاة ومباركة العيد لمن حولك من مصلين وجيران .. ثم الجائزة الكبري وهي ذبح الخروف واكل المرارة النية ( مهما تثقفنا لا يمكننا ترك هذه العادة ) وزيارة الأهل والأحباب .. هذا ما نفعلة في منطقتنا ..

موضوع جميل

طيب نحن من الصباح في العيدين بنمشي نقعد في (التايه) والتايه يعني محل الاجتماع للافطار في رمضان واي زول بجيب زلابيا وشاي من البيت واي زول بيشرب من شاي جارو وبنمسك اي زول جاي حايم ونشربو الشاي والزلابيا

بعد داك برنامج الحمام والصلاة والخروف ذي ما قال عروه والمراره والكلوة النيه وهكذا

انا ملاحظ انو الناس مركزه على موضوع الحمام ده بزياده ما هو كلنا بنستحمى وكل يوم ولا انتو من ذوات الحمام العيدي فقط
تسمع في الحمام اغنيه(الليله عيد يا وله)

هاهاهاهاهاهاهاهاهاها .. عليك خفة دم يا زيزو ما شفتها قبل كدا أبدا تنفع ممثل كوميدي .. حمام العيد يختلف عن أي حمام تاني لسبب بسيط وذلك لأنه يرتبط بحدث مميز يحدث مرتين فقط في السنة وهذا الحدث المميز هو صلاة العيد .. وكذلك الحال بالنسبه لصلاة الجمعة والتي أيضا تمتاز بحمامها الخاص بها .. فهمت وجهة نظرنا ولا لسع أشرح أكتر ...

في ناس مادوروا العيد عشان حمامو دا الواحد منهم يقول ليك خلاص جا العيد لي برودا(برودا أي حمامو)شوفتو كيف؟؟؟؟

بالنسبه لي احمد امين و عروه ما ورونا منطقتهم الي حكولنا طقوسهم فيها واعتقد ان دا ضروري

المهم نرجع لموضوع العيد وطقوسه عندنا ف مدينه دنقلا العامره

انا ما حاقد اقلكم اني بصحي بدري و بعد داك امشي امسك الفرشه باليمين و المعجون بالشمال من نهايتو واضغط المعجون برفق حتي تخرج الماده من قدوم الانبوبه بعد داك اتسوك وبعد السويك طبعا ح اتوضا(امال امشي الصلاه بدون وضو)وبعد داك امشي صلاه الفجر ولما ارجع امشي اخش الحمام عشان استحمي طبعا حمامي دا حمام روتيني كل يوم مش من عيد لعيد زي ناس كدا

وما حاقعد اقولكم اني بعد الحمام امشي البس الجلبايه الجديده والسروال الجديد وال... الجديد يعني كلو جديد في جديد وشرط عندي يكون كلو ابيض في ابيض الا الشبشب يكون اسود وبعد داك اخت الريحه

وما ضروري اقلكم بعد ما اتجهزت اول حاجه اعملها امشي ابارك العيد لاحلي واجمل وارق والطف واحن ام ف الدنيا الي هي امي انا ...وبعد داك طبعا ابارك لباقي ناس البيت كلهم
وبعد ما اباركلهم امشي اشرب الشاي وانا بفضل الشاي يكون بخبيز معمول ف البيت ما جاهز

طبعا الكلام الفوق دا كلو ما ضروري يمكن بتعملوهو كلكم ودي ما تعتبر حاجه بتميز عشان اقولها يعني

لكن المهم اننا بعد داك نمشي(انا وابوي واخواني الاتنين) صلاه العيد وطبعا ف الصلاه بتلاقي عدد كبير من اهل البلد وتعيد عليه

وقبال ما نرجع البيت نخرم علي بيت العمات ونعيد عليهم
ولما نرجع البيت نلقي اعمامنا كلهم جو البيت الي هو البيت الكبير بتاع العيله

وبعد داك نمشي نقبل علي كبش الفداء ويدبح بالسنه طبعا ما فجيخ وخنق ساي..طبعا البيدبحو ويقطعو ديل الرجال اما الحريم عليهم يبهرو ويدخلو ف الفرن(طبعا في دنقلا عندنا حلات افران.دي بتكون معموله من الطين ما حقت غاز يعني)واثناء الدبح والقطيع يقوم واحد من السغار الي هو انا ف الغالب اقوم اجهز المنقد(الكانون)واجهز الفحم واقوم اعمل احلي شيه كتصبيره للناس لحد ما يجي الفطور و نفطر (وبرنامجنا فطور بس يعني ما في غدا) وبعد داك نتونس شويه ونشرب الشاي الاخضر او الشامبيون(البيبسي سابقا) حسب كيفك يعني
وبعد داك كل واحد يفرتق بيتم
و اليوم التاني والتالت بيكونو برضو في نفس بيت العيله وفطور بس



طبعا نحن بنختلف شويه مع بعض العائلات ف دنقلا
ديل يكونو كل يوم في بيت يعني ما بيفضلو يقضو التلاته ايام ف بيت العيله وبعض العائلات بيكون برنامجها فطور وغدا وديل برنامجهم احلي طبعا

طبعا لو دايرني افصلك اكتر يا ود عمر اديني خبر بس انا حاسي اني معطكم حبتين .. شان كدا نكتفي بكدا

موضوعكم جميل جدا بس السودانيين ديل برنامجنا واااااااااحد رغم اختلاف المناطق بس في الاعياد اهم شي اللمة

طبعا يا جماعه العيد يميزه عن باقي ايام السنه صلاة العيد فبتلقى ناس كتيره ملتزمه بالذهاب لصلاة العيد تسأله ليه يقوليك دي الحاجه الوحيده الي بتخليني اشعر بالعيد اصلوا العيد ده بقى بتاع الشفع, يلبسوا جديد وياكلوا الحلويات ويتفسحوا لكن انحنا هم الخروف الي بقى سعره بقرابة دفعة اولى لعربيه فوق راسنا والضباحين الي بقوا يتعززوا ويفتشليهم زي الحاجه السمحه ولمن تلقاهم يقوليك بملء فمه اضبحليك ب50الف ويسالك مش انت الي تسالوه: وين عدتك؟ويجيب هو وليس انت: والله يا حاج ما عندي عده لكن اسال ناس بيتكم بيكون عندهم سكين سنينه (زي كأني غبت عن ناس بيتنا 500 سنه عشان اكون ما عارف عندنا سكين ولا لأ)
طبعا انا بقول الكلام ده لانو السنه دي ضبحنا خروفنا برانا لحمنا في بيتنا وقروشنا في جيبنا ويا بخت الي شال الجلد لانو فيه كترت لحم............... خليها ساي
عيد المدن مختلف عن عيد غير المدن (ما عايز اقول الاقاليم) عيد الخرطوم حلو لكن هادي زياده عن اللزوم
انا عايز اسال سؤال وين راحت روح العيد الي بقى بتاع شفع؟ وارجوا الاجابه

شكرا حتي يكمل الشكر
تفاعل هايل
العيد في منطقتي مختلف ؟؟؟؟؟
العيلفون
طبعا بعد المسواك
والصلاة
نتجهز كلنا ونتجه لاكبر ساحة بالمدينةوتبدا طقوسنا فالجميع ينتظر شيخ الجامع العتيق الذي ياتي ويصطحب معه كل منى يسكن وراءه وجواره في حالة من مديح منظوم للعيد والحجيج
وصل الموكب.....
والصلاة والخطبة وتكاتف وتعانق بصورة غير طبيعية وطلب العفو والدعاء باجمل وارق الامنيات وتبدا الاتصالات بالمغتربين وارسال التهاني والمعايدات
يمر الموكب راجعا متوج بالزغاريد والتكبير وطبعا ازعاج الاطفال بالالعاب النارية
نمشي البيت وتبدا المشاوي والشرابيت واكرام الضيف شربوت بااااااااااااااااااارد ومركز
ماتمشوا بيعد والله ما مخمر




دامت الافراح ودمتم زينة كل عيد