•°•°•موسم2008-2009 تفوق بالأرقام يا غسان •°•°•

**ahmed amin** 25/10/2009, 16:02

بسم الله والحمد لله

موسم 2008-2009 اكد تفوق سيد البلد هلال الملايين علي وصيفه الحنين الحزين حتي قبل نهايه بطوله الدوري الممتاز تفوق حتي لحظه كتابه هذا الموضوع وبالارقام يا غسان

في الدوري الممتاز اكد الهلال تفوقه علي جميع الفرق المشاركه فيه بما فيها المريخ كما ذكرنا

الهلال لعب هذا الموسم 18 مباراه كسب منها 17 مباره وتعادل في مباراه واحده ليجمع 52 نقطه من اصل 54 وقولو ما شاء الله
طبعا ما حنكتب موضوع ذي ده وما نذكر فيه المقارنه بوصيفنا الحنين
المريخ لعب 18 مباراه كسب13 وتعادل في 5 منها ونحمد له انه لم يخسر (طبعا أول خساره حتكون يوم 30 نوفمبر باذن الله) (ذي ما شايف يا غسغس ولو ملاحظ انا واقف معاكم في جميع مبارياتكم القادمه وبتمني انكم ما تخسروها يعني بس تعادلو فيها)

نعود للارقام رماة الهلال تمكنو من ايداع 53 هدف في شباك الخصوم بينما احرز مهاجمو المريخ 46 هدف يعني الي هذه اللحظه اقوي هجوم هو هجوم الهلال
بالنسبه للدفاع فقد ولج مرمي سيد البلد فقط 5 اهداف اما المريخ فقد استقبلت شبكته 12 هدف ( التقول شبكه MTN )
يعني اقوي دفاع الي الان هو دفاع الهلال

الفريقان التقيا في الدوره الاولي للمتاز وانتهت المباراه بالتعادل في استاد الخرطوم الذي اعتبر ملعب الهلال وادرك المريخ فيها التعادل في اخر دقيقه من عمر المباراة وتلك محمده له سنعود لها لاحقا

الفريقان لعبا هذا الموسم في دوري ابطال افريقيا في ظاهره هي الاولي من نوعها في تاريخ السودان والبطلين

وعشان نعمل مقارنه بين هلال مريخ الابطال بعيدا عن اجواء الدوري الممتاز وكاس السودان يعني مقارنه علي نطاق القاره وضح جليا تفوق المارد الازرق علي وصيف السنين الحنين وواوقعت القرعه بالفريقين في نفس المجموعه وكانها تقول (الحشاش يملا شبكة التاني ويورينا تفوقه) طبعا الموضوع ده الناس كلها تباعتو واكد الهلال تفوقه من جديد علي المريخ بعد ان انتزع منه اربع نقاط كامله كانت كفيله بان تجعل الفريق يترشح للدور نصف النهائي (طبعا هنا انتهت رحله الازرق بعد ان اصطدم بمازيمبي العنيد ورغم تفوقه عليه في عقر داره وجعله لجماهيره في الكنغو والسودان تشرب ما تروي)

المهم مازيمبي تفوق علي الهلال بمجموع المباريتين بخمسه اهداف مقابل اربعه للهلال

هذه المقارنه بين لقائي الفريقين المباشريين بالنسبه للمواجهات مع الفرق الاخري فقد اكد ابوالهل علو كعبه فيها ع المريخ الذي لم يتمكن حتي من فوز واحد في سته مباريات خاضها داخل وخارج ارضه يعني تزيل مجموعته بكل جداره ودون منافس بل اكثر من ذلك تزيل حتي المجموعه الاخري حيث ان اقل فريق واسوء فريق في المجموعتين تمكن من احراز سته نقاط عدا وصيفنا الحنين

(يعني يا تيتو لو زيسكو وكانو ديل بقو سودانيين المريخ وصافه نهي)

خلاصه الكلام
الهلال تفوق اقوي هجوم هذا الموسم في الدوري الممتاز واقوي دفاع طبعا افضل فريق بالنسبه للنقاط
المريخ نحمد له انتزاعه لنقطه كامله من استاد الهلال هذا الموسم في الدوري الممتاز
الهلال طبع جندله بثلاثيه (التي هرت البطون وقطعت الاكباد) وانتزع منه نقطه من استاده علي مستوي الابطال

طبعا الامل المتبقي الوحيد للمريخ هذا الموسم هو احراز البطوله المتمرده علي الازرق بطوله كاس السودان وان تبقي له شئ من ضياء في اخر سرداب الممتاز بان يخسر الهلال ثماني نقاط فيما تبقي من مباريات (طبع كل حاجه وارده في كره القدم ولكن مع فرق الدوري الكحيانه التعبانه لا اظن ذلك اللهم الا اذا لجأ المريخ الي لجنه التحكيم المركزيه كما فعل العام المنصرم ليحرز بطوله ليست من حقه ولكن حتي وان فعل ذلك لا احسبه سيحرز البطوله البتشبه الهلال وبشبهها)

ان كان هناك حقيقه خاطئه ذكرتها يا غسان لك ان تعدلها وان كان غير ذلك فالرماد كال افواهكم هذا العام واني لأراه ملازمكم خمسه سنوات قادمات

أرفع رأسك انت هلالابي...

**Orwa Abdelmonim** 25/10/2009, 19:36

إمممممم .. ياربي غسان حيرد كيف بعد كل هذه الأرقام ؟!! أو تري هل سترد سمبلة ؟!

**ahmed amin** 26/10/2009, 20:37

يلا يا غسغس والله ما عهدناك مستسلما

**d.sombola** 27/10/2009, 04:13

في شنو ي عروتك مالك بتزيد في الحطب
ماتركز ليك علي جانب اخير ليك نص نص كدا مااااااااااااااااااابنفع
-----------------------------------
بس ماتقول لي عينك في الفيل وضله المعفصينو.....الخ قديمه عارفاها لكن احمودي دا ماجاب سيرتي عشان عارفني مابتفاصح معاه (((مابستاهل يردو عليه ))).
اها انت مــــــــــــــالك علي
وماتقول لي ماعندك وطنيه لي فريقك , بس انا واقعيه ودي رياضه وهيا ياغالب ي مغلوب , ويوم ليك ويوم عليك
-----------------------------------
معليش علي ((( زي مابقول واحد كدا))) النــــــــقــــــــه

**Orwa Abdelmonim** 27/10/2009, 18:02

إممممم .. يبدو أن سمبلة لم تتحمل كل هذه الأرقام المخيفة .. أنا زي ما قلت بدري لا أحب الكورة عموما و السودانية خصوصا مطلقا وما أظن في يوم حأتابعها .. لكن بحب أمغس للمهزومين سواء مريخ أو هلال وأتمتع بمشاهدة الغيظ علي وجوههم .. ولسع برضو ما رديتي علي موضوع أحمد دا !.

mhdinho 27/10/2009, 18:24

يا ابوحميد الموضوع دا مفرق منو اصلا وعمرو الضل ما بسبق سيدو !!!!!!!!
الحمد لله اني حي ازرق!!!!!!!

**ahmed amin** 27/10/2009, 22:02

يا اخوانا بالراحه علي سمبله لاني عارفها ما بتحب الارقام وطبعا كده بي عزرها ولكن...

ولكن اين العزيز غسان المريخابي الولهان

فينك يا ريس؟؟؟؟

HUSSAM 4/11/2009, 04:50

هـــــلال الأرقـــــام هلا

براه سيد البلد وسيد الكـل I love you

•°•°•موسم2008-2009 تفوق بالأرقام يا غسان •°•°•

•°•°•موسم2008-2009 تفوق بالأرقام يا غسان •°•°•

رد: •°•°•موسم2008-2009 تفوق بالأرقام يا غسان •°•°•

رد: •°•°•موسم2008-2009 تفوق بالأرقام يا غسان •°•°•

رد: •°•°•موسم2008-2009 تفوق بالأرقام يا غسان •°•°•

رد: •°•°•موسم2008-2009 تفوق بالأرقام يا غسان •°•°•

رد: •°•°•موسم2008-2009 تفوق بالأرقام يا غسان •°•°•

رد: •°•°•موسم2008-2009 تفوق بالأرقام يا غسان •°•°•

رد: •°•°•موسم2008-2009 تفوق بالأرقام يا غسان •°•°•